01مين إحنا
قندس (Beaver) — منبني مواقع وأنظمة لأصحاب الشغل بالقدس والمنطقة. لأي سؤال عن بياناتك: hello@beaveraiagency.com
02شو منجمع
- فورم طلب المشروع: اسمك، رقم تلفونك، إيميلك، اسم شغلك (اختياري)، وإجاباتك عن المشروع. ومعهم مصدر الزيارة لو موجود — مثلاً اسم الإعلان أو الموقع اللي وصلت منه.
- المساعد الذكي (فقاعة «اسألنا»): الرسائل اللي بتكتبها فيه. ولو اخترت تعطيه اسمك ورقمك، بنستلمهم كطلب تواصل. الرسائل بتمرق من السيرفر تبعنا وما منحتفظ فيها — إلا لو صار عطل تقني، بينحفظ سجلّه عشان نصلّحه.
- معلومات تقنية: متل أي موقع، السيرفر بيشوف عنوان IP ونوع المتصفح عشان يوصّلك الصفحة. والمساعد والفورم بيستعملوا عنوان IP ليحدّدوا عدد الرسائل ويمنعوا الإساءة.
03ليش منستعملها
- عشان نرد على طلبك ونتواصل معك بخصوصه بس.
- عشان المساعد يقدر يجاوبك.
- عشان نحمي الموقع من الإساءة.
- عشان نقيس إعلاناتنا ونعرف أي إعلان جاب طلبات — بس إذا وافقت على الكوكيز.
ما منبعتلك رسائل دعاية إلا إذا وافقت عليها لحالها.
04مين بيشوفها
ما منبيع بياناتك ولا منشاركها مع حدا لدعاية. بس في خدمات بتشغّلنا الموقع، وكل وحدة بتشوف اللي بلزمها:
- Anthropic — الشركة اللي ورا Claude، بتعالج رسائل المساعد الذكي عشان يكتب الرد.
- Telegram — فورم الطلب بيمرق من السيرفر تبعنا وبيوصلنا كرسالة على تلجرام، وهناك بيضل عشان نرجعلك. ونفس الإشي لما تعطي المساعد معلومات تواصلك.
- Hetzner — الشركة اللي عندها السيرفر تبعنا.
- Google Fonts و jsDelivr — الخطوط وكود الحركة بالصفحة بينحمّلوا من عندهم، فبيشوفوا عنوان IP تبعك.
- Instagram — لو اخترت تراسلنا على إنستغرام، المحادثة بتمشي حسب شروطهم.
- Meta — بس إذا وافقت على الكوكيز: بكسل ميتا بيعرف إنك زرت الصفحة أو بعتت طلب، عشان نقيس إعلاناتنا على فيسبوك وإنستغرام. ميتا بتستعمل هالمعلومات حسب سياستها.
- Google Analytics — بس إذا وافقت على الكوكيز: بيعدّ الزيارات ومن وين إجت، بلا ما يعرّفنا مين إنت.
بعض هالخدمات سيرفراتها برّا البلاد، فبياناتك ممكن تنتقل لبرّا عشان تشتغل.
05كوكيز وتخزين بالمتصفح
ما منستعمل كوكيز، ولا أدوات تحليلات، ولا تتبّع إعلاني.
الكوكيز بتشتغل بس إذا ضغطت «موافق» بالشريط اللي بيطلع تحت الصفحة. هي تبع أدوات قياس الإعلانات المذكورة فوق. لو ضغطت «لا شكراً»، ولا وحدة منهم بتشتغل. وبتقدر تغيّر رأيك بأي وقت: إعدادات الكوكيز.
بنحفظ شغلتين بمتصفحك إنت، مش عنّا:
- محادثتك مع المساعد — عشان ما تضيع لما تنقّل بين الصفحات. بتقدر تمسحها من زر «محادثة جديدة» بالمساعد.
- مصدر الزيارة — بيروح لحاله لما تسكّر التبويب.
- اختيارك بخصوص الكوكيز — عشان ما نسألك كل مرة.
06قديش منحتفظ فيها
منحتفظ بطلبك قد ما بلزم للتواصل معك ولأي شغل بينا. رسائل المساعد ما منحتفظ فيها، إلا سجلّات الأعطال التقنية. وبتقدر تطلب نمسح أي إشي عنك بأي وقت.
07حقوقك
بتقدر تطلب تشوف شو عنّا عنك، تصحّحه، أو تمسحه. ابعتلنا على hello@beaveraiagency.com ومنرد عليك.
08لو تغيّرت السياسة
بنحدّث هالصفحة والتاريخ اللي فوق.